Мардуми шарифи Тоҷикистони азиз бо фараҳмандӣ ва сарфарозӣ дар фазои сулҳу субот ва ваҳдату ягонагӣ соли 2023-ро зери роҳнамоиҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо дастовардҳои назаррас сипарӣ намуданд.
Тавре ба ҳамагон маълум аст, зимни ироаи Паёми навбатии Президенти Ҷумҳурии Тоҷикистон ба маҷлиси Олии Ҷумҳурии Тоҷикистон санаи 28.12.2023 як қатор дастоварду музаффариятҳо дар бахшҳои гуногун, махсусан дар бахши иқтисодиёти кишвар садо дода шуд. Аз ҷумла, тавре таъкид гардид “Тайи солҳои охир таваҷҷуҳи аввалиндараҷаи Ҳукумати мамлакат ба масъалаҳои пешгирӣ кардани таъсири хавфҳои эҳтимолӣ ба иқтисоди миллӣ, истифодаи самараноки иқтидорҳои мавҷуда, саноатикунонии кишвар ва таъсиси ҷойҳои корӣ равона карда шуд”.
Дар воқеъ иқтисодиёти миллӣ дар асоси ташаккули соҳаҳои саноати мамлакат ва дар заминаи баландбардории самаранокии истеҳсолоти ҷамъиятӣ рушду такомул намуда, ба ин васила таҳкими низоми иқтисодии кишвар ва рақопатпазирии маҳсулоти ватанӣ таъмин карда мешавад. Дар натиҷаи тадбирандешиҳои Ҳукумати Ҷумҳурии Тоҷикистон ҷиҳати амалишавии ҳадафи чоруми миллӣ- саноатикунонии босуръати кишвар ва дар ин замина баҳри таъмини рақобатпазирии маҳсулоти ватанӣ бобати пешгирӣ аз таъсири омилҳои беруна ба иқтисодиёти кишвар, дар соҳаи саноат як қатор стратегияву барномаҳои соҳавӣ, аз ҷумла Стратегияи миллии рушд барои давраи то соли 2030, Стратегияи рушди саноат дар Ҷумҳурии Тоҷикистон барои давраи то соли 2030, Барномаи саноатикунонии босуръати Ҷумҳурии Тоҷикистон барои солҳои 2020-2025, Барномаи рушди металургияи ранга ва сиёҳ дар Ҷумҳурии Тоҷикистон барои давраи то соли 2025, Барномаи рушди соҳаи геологияи Ҷумҳурии Тоҷикистон барои солҳои 2021-2030 ва ғайраҳо қабул карда шуданд, ки дар асоси иҷрои талаботҳои пешбинишудаи стратегия ва барномаҳои мазкур барои расидан ба ҳадафҳои стратегии мамлакат заминаи мусоид фароҳам гашта истодааст.
Дар ин баробар, баҳри саноатикунонии иқтисодиёти Ҷумҳурии Тоҷикистон омили дигаре, ки таъсиррасон буда метавонад, ин сармоягузорӣ ба соҳаҳои саноати кишвар ба шумор меравад, ки он ҷиҳати дастрасӣ ба технологияҳои муосири истеҳсолӣ ва азнавсозии воситаҳои истеҳсолот мусоидат менамояд. Бо дарназардошти омили мазкур Пешвои муаззами миллат ба ин масъала таваҷҷуҳи хосса зоҳир намуда, зикр намуданд, ки “Ҳукумати мамлакат рушди бахши хусусӣ, соҳибкорӣ ва сармоягузориро дар Стратегияи миллии рушд барои давраи то соли 2030 ҳамчун воситаи асосии ноил шудан ба ҳадафҳои миллӣ муайян кардааст ва ҷиҳати фароҳам овардани шароити мусоид барои пешбурди фаъолияти соҳибкориву сармоягузорӣ, барои сармоягузорӣ ҷолиб гардонидани иқтисодиёти кишвар ва ба содирот нигаронидани он пайваста чораҷӯйӣ менамояд. Дар натиҷаи тадбирҳои амалигардида шумораи субъектҳои соҳибкорӣ дар 7 соли охир аз 62 ҳазор ба 350 ҳазор баробар гардид”.
Мусалам аст, ки сармоягузорӣ ба соҳаҳои саноати кишвар аҳамияти калон дошта, дар заминаи таъсиси корхонаҳои саноатӣ ва ҷори намудани технологияҳои муосир дар истеҳсолот, паёмадҳои дигари мусбиро ба монанди бо шуғл таъмин намудани аҳолии қобилияти меҳнатидошта, баланд гаштани сатҳи даромаднокии аҳолии мамлакат, кам шудани сатҳи камбизоатӣ, афзоиш ёфтани истеҳсоли маҳсулоти ниҳоӣ ва бо маҳсулотҳои аз ҷиҳати экологӣ тозаи ватанӣ таъмин гаштани бозори дохилӣ мебошанд, ки ба ин паёмадҳо бевосита метавонанд ба рақобатпазирии маҳсулоти ватанӣ оварда расонанд. Нишондиҳандаи дигаре, ки зимни ироаи Паёми Пешвои муззами миллат ба Маҷлиси Олии Ҷумҳурии Тоҷикистон садо дода шуд, ин буд, ки “Танҳо дар соли 2023 соҳибкорони мамлакат 715 корхонаи нави истеҳсолӣ бо 5 ҳазор ҷойи корӣ сохта, ба истифода супориданд”. Нишондиҳандаҳои мазкур гувоҳи онанд, ки сармоягузорӣ аз ҷониби соҳибкорони ватанӣ ба соҳаи саноати мамлакат хело назаррас буда, дар рушди соҳаҳои иқтисодию иҷтимоии мамлакат мунтазам саҳми созгор мегузоранд.
Бо мақсади таҳкими низоми иқтисодии кишвар ва рушди бемайлони минбаъдаи он, аз ҷониби Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид гардид, ки “Ҳукумати мамлакат ва мақомоти иҷроияи маҳаллии ҳокимияти давлатӣ вазифадоранд, ки барои баланд бардоштани шаффофият, боз ҳам беҳтар гардонидани фазои соҳибкориву сармоягузорӣ ва бартараф кардани монеаҳои маъмуриву сунъӣ дар ин самт тадбирҳои саривақтиро амалӣ созанд ва ташаббусҳои соҳибкоронро ҳаматарафа дастгирӣ намоянд”.
Дар Паёми навбатии роҳбари давлат ба сармояи инсонӣ, ки ҳамчун пояи устувори иқтисоди миллӣ арзёбӣ мегардад, таваҷҷуҳи хоса зоҳир гардида, таъкид намуданд, ки “Рушди муосири иқтисодиёт ва баланд бардоштани рақобатнокии он бидуни рушди сармояи инсонӣ ғайриимкон мебошад. Вобаста ба ин, сатҳи рушд ва самаранокии истифодаи сармояи инсонӣ барои давлату Ҳукумат аҳамияти аввалиндараҷа дорад”. Воқеанҳам таъкидҳои Пешвои миллат ба маврид буда, дар низоми иқтисодёти кишвари алоҳида ва ё ҷаҳон илму дониш, ки натиҷаи мусбии қобилиятҳои фикрию зеҳнии инсон ба шумор мераванд, наметавонад дар алоҳидагӣ вуҷуд дошта бошад. Бинобар ин, сармояи инсонӣ бо дарназардошти фазои таъғйирёбандаи низоми иқтисодиёти ҷаҳон дар алоқамандӣ ва ҳамоҳангии зич қарор дода шавад. Мавҷудияти чунин алоқамандӣ метавонад дараҷаи инкишофи сармояи инсонӣ ва иқтидори қобилиятҳои зеҳнии инсониро муайян сохта, ба ташаккули низоми иқтисодиёти кушод мусоидат кунад ва мубодилаи баробари иттилоот ва маҳсулоти истеҳсолиро дар миқёси ҳамкории минтақавӣ ва байнидавлатӣ таъмин кунад.
Дар ҷумҳурӣ захираву имкониятҳои кишвар, аз лиҳози ашёи хоми ватанӣ, захираҳои меҳнатӣ ҷиҳати истеҳсоли энергияи сабз ва ташаккули иқтисодиёти сабз ба таври кофӣ мавҷуд буда, имкониятҳои васеъ ҷиҳати ноил шудан ба яке аз ҳадафҳои стратегӣ – саноатикунонии босуръати кишвар ҷой доранд. Аз ин лиҳоз, Президенти кишвар зимни ироаи Паёми солона зикр намуданд, ки “Бо мақсади истеҳсоли «энергияи сабз», рушди «иқтисоди сабз» ва паст кардани партови газҳои гулхонаӣ зарур аст, ки дар самти сармоягузории давлатӣ ва рақамикунонии ҳифзи муҳити зист тадбирҳои иловагӣ амалӣ карда шаванд” . Бо боварии комил метавон гуфт, ки дар натиҷаи вазифгузориҳо ва тадбирҳои андешидашудаи Ҳукумати Ҷумҳурии Тоҷикистон истеҳсоли энергияи сабз дар кишвар аз 98% ба ҳади ниҳоӣ расонида мешавад, ки ин ба амалисозии ҳадафи чоруми миллӣ – саноатикунонии босуръати кишвар қуваи дигар мебахшад. Дар ин робита, қайд кардан ба маврид аст, ки роҳандозии саривақтии тадбирҳои зикршуда барои баландшавӣ ва афзоиши нишондиҳандаҳои иқтисоди сабз мусоидат намуда, сабаби кам шудани партови газҳои гулхонаӣ ба атмосфера мегардад.
Дар қатори соҳаҳои дар боло зикршуда, соҳаи дигаре, ки барои таҳкими низоми иқтисодии кишвар ва амалишавии ҳадафҳои стратегии мамлакат мусоидат менамояд, соҳаи геология кишвар ба шумор меравад. Бинобар сабаби дар сиёсати давлатӣ аҳамияти муҳим доштани иқтисодиёти саноатӣ куҳӣ ҷиҳати бозҳам кашфу дарёфти сарватҳои зеризаминӣ ва барои пайдо намудани конҳои канданиҳои фоиданок Президенти кишвар муҳтарам Эмомалӣ Раҳмон зимни ироаи Паёми солонаи худ таъкид доштанд, ки “Ба Ҳукумати мамлакат ва Саридораи геология супориш дода мешавад, ки фаъолиятро доир ба баланд бардоштани сатҳу сифати омӯзиш, ҷустуҷӯ, иктишоф ва барои истифодаи саноатӣ омода намудани конҳои канданиҳои фоиданок вусъат бахшанд” Дар ҳошияи дастуру супоришҳои Пешвои муаззами миллат соҳаи геологияи кишвар, ки яке аз шохаҳои асосии иқтисодиёти давлат ба ҳисоб меравад, ташкил ва роҳандозии корҳои омӯзиши геологӣ, афзунгардонии заминаи ашёи минералӣ ва ҳифзи қаъри замин, ҷустуҷӯ ва дарёфти сарватҳои зеризаминиро таъмин менамояд. Аз ин лиҳоз, дар Паёми навбатии Президенти Ҷумҳурии Тоҷикистон ба маҷлиси Олии Ҷумҳурии Тоҷикистон бо дарназардошти афзалиятҳои соҳаи геологияи кишвар ба масъулин ҷиҳати таъмини рушди минбаъдаи соҳаи мазкур бо истифода аз технологияи муосир ва бо ҷалби мутахассисони соҳавӣ дастурҳои мушаххас дода шуд.
Аз таваҷҷуҳи хоссаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаи иқтисодиёти мамлакат бо эътимод ва боварии комил метавон гуфт, ки дар фурсатҳои наздиктарин кишвари мо дар заминаи таҳкими низоми иқтисодии кишвар ба ҳадафҳои стратегии худ ноил гардида, сатҳи зиндагии мардуми кишвар тадриҷан бозҳам беҳтар мешавад.
